རབ་འབར་མེ་ལྕེས་ས་གཞི་སྲེག་འདྲའི་མི་ཡུལ་དམྱལ་ཁམས་གསོན་པོ་རུ།

ཁྲག་ཞག་རྒྱ་མཚོ་འཁྱིལ་བའི་ཡུལ་གྱི་ཉམ་ཐག་གདོང་དམར་མི་རིགས་ཁྲོད།

དྲག་ཆར་འབེབས་འདྲའི་མཚོན་ཆ་འོག་ནས་ཞུམ་མེད་མགོ་བོ་གྱེན་བཏེགས་ཏེ།

མེ་ལྕེ་དྲག་པོའི་ཀློང་ན་འགྱིང་པའི་གངས་ཅན་བོད་ཀྱི་དཔའ་རྒོད་རྣམས།

མཐོང་བའི་མོད་ལ་གཤིན་རྗེ་ཡིན་ཡང་འཇིག་སྣང་ལག་ནས་མཚོན་ཆ་ཤོར།

གྲུ་འཛིན་རི་བོ་གསུམ་པ་གཉིས་མེད་རྡ་སྟེང་པུས་མགོའི་རི་བོ་ན།

ལྷར་བཅས་འཕགས་མཆོག་སྤྱན་རས་གཟིགས་ཀྱང་སྤྱན་ཆབ་བསིལ་བའི་དུས་སྐབས་སུ།

ཤཀྱའི་རྒྱལ་པོ་གཙོ་འཁོར་དང་བཅས་གངས་རིའི་ལྗོངས་སུ་མྱུར་དུ་གཤེགས།

ཤཱ་རིའི་མོོ་འགལ་མཆོག་ཟུང་གཉིས་ཀྱང་འཁར་བསིལ་དཀྲུགས་ཏེ་ད་ཚུར་བྱོན།

འཇམ་དཔལ་དཔའ་བོས་ཕྱག་གཡས་རལ་གྲི་རྣོ་ངར་སྤྱོད་པའི་དུས་ལ་བབས།

ཕྱག་ན་རྡོ་རྗེས་སྡིགས་མཛུབ་དང་བཅས་ལན་གཅིག་རྡོ་རྗེ་དགྲ་ལ་བསྣུན།

དབྱངས་ཅན་ལྷ་མོས་པི་ཝང་བརྡུངས་ནས་བྷོ་ཊིའི་འབོད་སྒྲ་དབྱངས་སུ་གྱེར།

ཏཱ་རེ་ལ་སོགས་སྒྲོལ་མ་ཉེར་གཅིག་ཉམ་ཐག་བོད་ཀྱི་འཇིགས་པ་སྐྱོབས།

ཀོོ་ཤི་ཀ་དང་ཚངས་པ་ལ་སོགས་མཐུ་ཆེན་རྣམས་ཀྱང་གཟིམས་ལས་ལོངས།

ཕྱག་དྲུག་མགོན་པོས་གྲི་གུག་ཐོད་ཕྲེང་ཌ་རུ་དཀྲོལ་བཞིན་ཤར་ལ་སོང་།

དམ་ཅན་ཆོས་རྗེས་དོལ་རྒྱལ་བསྒྲལ་ཏེ་རྒྱ་འདྲེ་ཀུན་ལ་དབྱུག་ཏོ་གཞུས།

དམག་ཟོར་རྒྱལ་མོས་དྲེའུ་རྟ་བཞོན་ཏེ་ཡེ་ཤེས་མེ་ལྕེའི་ཀློང་འགྱིང་ནས།

མེ་སྤུངས་འབར་བའི་གངས་ཅན་བོད་ཀྱི་དཔའ་རྒོད་ཉེར་གསུམ་གྲོགས་སུ་བྱོན།

ཁ་གདངས་མཆེ་གཙིགས་རྒྱ་རོ་ཟོས་ལ་ཨ་ལའི་གད་མོ་འབྲུག་སྟོང་སྒྲོགས།

པེ་ཧར་རྒྱལ་དང་ག་གདོང་ལ་སོགས་གཞུང་བསྟེན་དགྲ་ལྷ་ཇི་ཡོད་རྣམས།

ཨརྒྷཾ་ལ་སོགས་མཆོད་གཏོར་བཞེས་ཙམ་འཕྲིན་ལས་བཅོལ་བའི་དོན་མིན་པས།

མ་འགྱངས་ལྷ་དམག་བྱེ་བ་འཁྲིད་དེ་རང་རང་མདའ་དང་གོ་མཚོན་ཐོགས།

པེ་ཅིང་སོང་ལ་ཧུའུ་ཅིང་ཐའོ་སོགས་དཔོན་ངན་དགུ་ཡི་མགོ་ལག་ལོངས།

ཞིང་བཅུ་ཚང་བའི་བསྟན་དགྲ་རྒྱ་དམག་ད་ལྟ་མྱུར་དུ་ཐལ་བར་རློགས།

བསྟན་མ་བཅུ་གཉིས་ལོང་མདོག་མ་བྱེད་གངས་ལྗོངས་བོད་ཀྱི་གཏེར་ཁ་སྲུང་།

ཚེ་རིང་མཆེད་ལྔ་འོན་མདོག་མ་བྱེད་མཐོ་སྒང་རྩ་ཆེའི་འཁོར་ཡུག་སྲུང་།

གངས་དཀར་ཡུལ་གྱི་སྣོད་བཅུད་རྒུད་ཚོགས་རང་བཙན་ངོ་སོ་ཡ་ལ་བསྟོད།